لو عايز تفضل شباب

كلنا شفنا خلاص شكلنا لما نكبر في السن بالأبليكيشن إياه ... لو عايز بقى تفضل محافظ على شبابك, كمل البوست ده للأخر و طبق السبع خطوات من النهاردة.
.
.
.

تعالوا الأول نعرف ... إيه هي الشيخوخة ؟
جسمنا من ساعة ما إتولدنا بيحصل فيه عمليتين عكس بعض, الأولى عملية البناء "Anabolism" و التانية عملية الهدم "Catabolism" ... طول الوقت فيه خلايا بتموت و تتكسر و خلايا بتتجدد و تنمو مكانها.

في السن الصغير, البناء بيكون معدله أعلى من الهدم, عشان كدة الأطفال بيكبروا و بمعدل سريع لحد ما نوصل لمرحلة البلوغ و اللي فيها العمليتين "Anabolism" و ال"Catabolism" بيكونوا ماشيين بشكل متقارب.

مع تقدم السن بتبدأ عملية البناء تتباطئ بالتدريج في حين إن عملية الهدم معدلها بيزيد و بيكون أسرع, عشان كدة بنلاقي تغييرات في الجسم بتحصل من أول الشكل الخارجي لحد كفاءة الأعضاء الداخلية اللي بتبدأ تقل لحد ميعاد معلوم عند الله.

طبعا عمرنا ما هنقدر نوقف السلسلة الطبيعية للحياة , لكن اللي نقدر نعمله هو إننا نبطئ بقدر الإمكان عملية الهدم و نزود معدل عملية البناء و اللي في النهاية هيوصلنا إننا لما نكبر في السن نلاقي نفسنا عندنا حيوية و نشاط و شكلنا أصغر و لسه شباب.
 عايز أقولكم إن معظم الناس اللي بتجيلي العيادة بنكتشف إن جسمهم أكبر من سنهم و ده لما بنقيس العمر البيولوجي بتاعهم في الأول خالص .. بيكونوا مثلا أكبر من سنهم ب 10 سنين و بعد لما بيعملوا خطوات بسيطة و سهلة لكن بيستمروا عليها يوميا, بنلاقي إن سنهم صغر تاني و جسمهم رجع للسن الطبيعي و ده بيحسوا بيه فعلا مش بس في الشكل, لكن كمان في الطاقة و الحيوية.

النهاردة بقى أنا جايبلكم 7 خطوات لو واظبنا عليهم يوميا هنحافظ على جسمنا و نفضل دايما شباب  ...

1- وقف سكر :
 السكر من أكتر الحاجات اللي بتسرع عملية الشيخوخة من جوة برة تأثير السكر على جسمنا بيبان على الجلد و زيادة التجاعيد, قلة كفاءة القلب, قصور الكبد و تأثيرات تانية كتير. ضيف مع السكر كمان الإضافات الصناعية للأكل.

2- زود مضادات الأكسدة :
 و دي سلاح الإنسان ضد الشقوق الحرة "Free Radicals" و اللي بتلعب دور مهم مش بس في الشيخوخة لكن في تطور الأمراض و اهمها السرطان. مضادات الأكسدة زي Vitamin A و Vitamin E موجودين في الدهون الصحية زي زيت الزيتون و الزيت الحار و كمان في الزبدة الفلاحي و السمن البلدي ده غير الخضروات و الفواكه اللي فيهم نسبة عالية جدا مضادات الأكسدة زي Vitamin C, Lycopene, Beta-Carotene, Lutein, zeaxanthin عشان كدة دايما بننصح أنا الخضروات تكون هي المكون الرئيسي لأكلنا و كمان ننوع في ألوانها.

3- أشرب من 2-3 لتر ماية يوميا :
 الماية مكون أساسي في جسمنا و بتدخل في جميع العمليات الحيوية المهمة, عشان كدة الناس اللي بتنسى تشرب ماية أو بتكسل بيظهر عليهم السن بدري.

4- إتحرك !!
 مبدأ عام .. العضو اللي مش بيستخدم بيضمر .. جسمك لو مش بتتحرك بيه و بتحرك عضلاتك و مفاصلك و بتحمل عليهم هيبدأوا بالتدريج في التآكل و الضمور ... فرق رهيب بين حد طول النهار قاعد على مكتب أو في العربية و حد تاني الرياضة جزء أساسي من يومه.

5- زود اكولاجين :
 محتاجين ناخد كولاجين كفاية في أكلنا, الكولاجين هو المسئول عن مرونة الجلد و المفاصل و مهم جدا للألياف العضلية ... لو عايزين نصغر يبقى مهم جدا نزود من الكولاجين في جسمنا عن طريق أكلات زي اللحوم الحمراء الي واكلة علف مظبوط و زي الكوارع ... كمان ممكن ناخد الكولاجين على هيئة مكمل غذائي و كمان مستحضرات للجلد.

6- نام كفاية :
 النوم الجيد من أهم الطرق اللي نحافظ بيها على شبابنا, في خلال فترة النوم, عملية البناء بتكون في أعلى نشاط ليها عشان كدة الناس اللي نومها قليل أو مضطرب يتكبر أسرع بكتير من الناس اللي بتنام نوم عميق و لمدة كافية من 6-9 ساعات.

7- لو عملت كل ده و إنت مدخن يبقى بترمي مجهودك في الأرض .. مش محتاج أتكلم عن التدخين لأنه فعلا من أكتر الحاجات المؤذية اللي بنعلمها في نفسنا و اللي حوالينا, كسر علبة السجاير دلوقتي و خلينا نبدأ بداية جديدة.

دي كانت بعض الخطوات البسيطة اللي ممكن نبدأ بيها من النهاردة و مش محتاجة مننا مجهود كبير لكن إنعكاسها على جسمنا عظيم جدا.

خلينا نبدأ عشان لما ربنا يديكم طول العمر و توصلوا للسبعين تلاقي صوركم أصغر من صور الأبليكيشن دلوقتي و خليكوا دايما فاكرين ... الطبيعي إننا نكبر, لكن مش شرط نعجز.
ياريت بقى نشير عشان نفيد كل حبايبنا.